البصل

الانترنيت و القنوات الفضائية بوظت اخلاق الواحد بيقولك فى الدول المتقدمة و غير المتقدمة فى هامش ربح للسلع الفذائية, متوفرة ولا لا بيقولك من 30 - 50 % للمواد الطازجة زى الخضار و الفاكهة و الالبان و الاجبان اللى صلاحيتها لا تزيد على اسبوع, والمعبأة اللى صلاحيتها اكثر من كده من 10 - 30 %, وقال ايه اللى يبيع اكثر من كده او اقل من كده بيتعمل له قضية حماية المستهلك وضد الاحتكار وبيدفع غرامة كبيرة, الدش والانترنيت هيبوظ اخلاقنا 21 سبتمبر 2023

البصل

- ابسط يا عم اهى الحكومة وقفت تصدير البصل و هيرخص - بجد هو احنا عندنا..... - ايوه ده البصل كتير متخفش - انا مش قصدى البصل, هو احنا عندنا حكومة اصلا - ايوه اكيد دى بتشتغل لمصلحة المواطن البسيط - كمان عندنا مواطن بسيط, دى الدنيا اتغيرت, بس قول لى مش دى حكومة الارز بـ 16 ولا 21, و بعدين بقى بـ 35 وصحيت من النوم 21 سبتمبر 2023

محدش يزعل: 3

محدش يزعل: 3 بعض ممن يهاجمون لاهوت السيد المسيح, يتسألون كيف ينكره تلميذه ويخونه اخر؟ وللاسف بعض المسيحيون يقعون فى نفس التساؤل, بخصوص الكهنة و الخدام, كيف يفعلون هذا وهم يمثلون اللـه, ويخدمون بيت الرب, كأن هؤلاء ليسوا بشر ومن الطبيعى ان يخطئوا, والشاطر اللى يفضل فى بيت ابوه مهما حصل, ما يعملهمش حجة لبعده عن بيت ربنا طريق ربنا معروف, امشى فيه حتى لو لوحدك ارجع لربنا زى موسى الاسود و اكيد هتلاقى الانبا ايسيذورس فى انتظارك, تقدر تاخد الخطوة الاولى خدها "فكل ما قالوا لكم أن تحفظوه فاحفظوه وافعلوه، ولكن حسب أعمالهم لا تعملوا، لأنهم يقولون ولا يفعلون." (مت 23: 3). "من أنت الذي تدين عبد غيرك؟ هو لمولاه يثبت أو يسقط. ولكنه سيثبت، لأن الله قادر أن يثبته." (رو 14: 4). 30 اغسطس 2023

محدش يزعل: 2

محدش يزعل: 2 كنت بتكلم مع شخص ما فبيقولى انا لى 10 سنين مدخلتش الكنيسة رغم انى ساكن جنبها ليه؟ فى مشكلة معينة؟ من عشر سنين ابونا زعلنى و قال لى كلمة زعلتنى قوى طب متروح تعاتبه او مش لازم تقابله, او قول لحد يقول له انك زعلان لا, مش هاعمل كده ابونا لازم يجيلى بنفسه, وممكن ساعتها اسامحه طب قول لى اسم ابونا والكنيسة وانا اكلمه, لا, انا حر فى قراراتى الكنيسة فيها كهنة كتير, روح لواحد غيرها او روح كنيسة تانية, شبرا فيها كتير و كلهم جنب بعض انا مرتاح كده , ملكش دعوة انت ضيعت من عمرك عشر سنين بعيد عن ربنا ومتعة الحياة مع ربنا انت الخسران, والكنيسة اللى مش عاوز تروحها على رجليك فى يوم هتخشها على ظهرك, و يمكن ابونا اللى مش عاوز تروح الكنيسة علشانه هو اللى يصلى عليك ويقول اغفر له يارب, "ولكن الذي لا يعلم، ويفعل ما يستحق ضربات، يضرب قليلا. فكل من أعطي كثيرا يطلب منه كثير، ومن يودعونه كثيرا يطالبونه بأكثر." (لو 12: 48). "لذلك أنت بلا عذر أيها الإنسان، كل من يدين. لأنك في ما تدين غيرك تحكم على نفسك. لأنك أنت الذي تدين تفعل تلك الأمور بعينها!" (رو 2: 1). 30 افسطس 2023

محدش يزعل

محدش يزعل: تلاقيه عمال يكتب الكنيسة مش بتسأل فى ومحدش بيفتقدنى, وتسأله انت تعرف مواعيد اب الاعتراف و القداسات, ايوه اعرفها, طب مش بتروح ليه فى حاجة تمنعك مرض او شعل او خطية مسيطرة عليك, لا نشكر ربنا, طب مش بتروح ليه؟ علشان محدش بيسأل على. عرفنا خلاص ان الكنيسة مقصرة معاك بس الحجة دى مش هتنفع قدام ربنا, انت مش مفلوج ليك 38 سنة, انت كامل العقل و الصحة وعارف الطريق كويس وباب الكنيسة مفتوح مش مستنى دعوة, وربنا يسامح الخدام على تقصيرهم, صليلهم علشان ربنا يقويهم ويساعدهم على الخدمة 28 اغسطس 2023

بغبغاوات

بغبغاوات مشكلة الفيس ان كثيرين بيكرروا الكلام و البوستات دون اى تفكير او حنى تروى كتبت زمان ان لقب "سيدنا" ليس معناه السيادة و العبودية و جبنا ادلة من البرديات اليونانية و القبطية من القرن السادس و السابع, و لسه ناس بتكرر الكلام القديم, علشان جى على هواها وللاسف منهم عمم, تلاقى اللى يقول ما الانبا فلان قال كده, ماشى يا عم الانبا فلان لم تكن معلوماته كاملة فى النقطة دية و لا هو معصوم من الخطأ, و لا حسب مزاجنا بنعيد الكلام 28 اغسطس 2023

من اظرف ما قابلنى

من اظرف ما قابلنى فى بيبلوجرافى الاساقفة, انك تلاقى معلومة فى كتاب متكررة فى كذا كتاب و مقال ولحد ماتوصل للمصدر الاصلى اللى كلهم نقلوا منه تكتشف ان المعلومة دى غلط وللاسف واضح وساذج فى احيان اخرى, و تتسأل مفيش حد من اللى نقل المعلومة فكر يراجعها او حتى يشير لاحتمال وجود خطأ, كله بينقل من كله دون مراجعة ربما لثقتهم فى المصدر الاصلى و لكن لا يوجد من لا يسهو او يخطىء, والمعلومات من النوعية دى مش قليلة حتى انى عملت ليها ملف خاص باخطاء المراجع المنشورة اتمنى ان ربنا يدينى العمر و الصحة و اكمله ولو ما حصلش اتمنى ان تعب السنين دية ميرحش وحد يكمله بعدى, صلواتكم 28 اغسطس 2023