فى حيرة مش عارف

الواحد اليومين دول فى حيرة مش عارف اكتب و لا ما اكتبش , حاجات بعد ما اكتبها امسحها و حاجات لما اكتبها و انشرها اندم عليها , فى الموضوعات الخاصة بالكنيسة تلك الايام 
محتار فعلا
لان الواحد مش بيكتب عن شىء بعيد عنه و لكن بيكتب عن امه , عن عيلته
مش عارف ازاى الناس دى بتكتب كده عن امهم
ربنا يسامحنا

توابع الزلزال : ( 2 )

توابع الزلزال : ( 2 )

تعرف ان الفلوس اللى فى الاديرة ( اللى بتتجمع من مصر و المهجر بجانب مشروعات الدير ) لو اتوزعت على الاقباط مش هيبقى حد فقير , تعليق بعض الاقباط على كارثة صراع الاموال

ده حوار سمعته من بعض بسطاء الاقباط , ربما سمعوه من شخص اخر او من وسائل الاعلام

المشكلة ان احنا احيانا بناقش موضوع من وجهة نظرنا و لكن من نخدمهم لهم رؤية مختلفة , المهم عندهم احتياجاتهم الاساسية , ربما الامور اللاهوتية فى المرتبة الثانية

نقوم بعمل نشاط او مؤتمر او اى خدمة من وجهة نظرنا هى ما يحتاجه المخدوم و لكن ربما هو يحتاج لشىء اخر مش اللى عملناه

المشكلة الثانية للاسف اصبح التفكير المادى هو المسيطر على الخدمة و على تفكير المخدومين , و السؤال هل تغيرت رؤيتهم للكنيسة انها مجرد خزينة مفتوحة للصرف على الاقباط و احيانا تبخل عليهم

كل هذه الامور تؤدى للانعزالية ,يصبح الاقباط منعزلين عن كنيستهم يرونها مجرد مؤسسة اجتماعية عتيقة , تعوق تقدمهم فى الحياة

يختفى العمل الروحى فيبحثون عن الشبع خارجا

وللاسف يستغل الاعلام هذا الامر و للاسف ايضا بعض من ابناء الكنيسة ليزيدوا من احساس الاقباط بالغربة عن الكنيسة ليصنعوا لهم اتباع و تلاميذ بحجج كثيرة

و تضيع الصورة الحقيقية للكنيسة

مجرد وجهة نظر

شجرة عدم الطاعة : ( 2 )

شجرة عدم الطاعة : ( 2 )
من اصعب الامور فى الخدمة هى الطاعة , ازاى اتخلى عن تفكيرى و ذاتى و شخصيتى و لكن الاصعب هو تبرير عدم الطاعة
من اسباب عدم الطاعة فى الخدمة اللى اغلبنا بيقع فيها :
- الاحساس انى بفهم اكتر من اللى اخواتى فى الخدمة و بالذات الامناء
- الاحساس بان حياتى الروحية حلوة كده ومش محتاج متابعة من احد
- الاحساس ان محدش بيسمع لارائى و اقتراحاتى رغم اننى احسن منهم
- الاحساس دايما انى احسن من كل من حولى فى كل الامور مهما كانت
- الاصعب عندما يصل هذا الاحساس للاباء الكهنة و الاساقفة و يخلينا ننعزل عن الكنيسة ككل و اعتبارها انها تعيش فى الجهل و مش من مستوانا
الغريب ان هؤلاء يطلبون من تلاميذهم الطاعة الكاملة بدون قيد او شرط
عدم الطاعة او الذات لما بتبقى هى الحاكم الامر فى حياتنا بخلينا نعيش فى كوكبنا الخاص و لا نتمتع بكنيستنا
للحديث بقية ................

توابع الزلزال : ( ١ )

توابع الزلزال : ( ١ )
تعرف ان الفلوس اللى فى الاديرة ( اللى بتتجمع من مصر و المهجر بجانب مشروعات الدير ) لو اتوزعت على الاقباط مش هيبقى حد فقير
تعليق بعض الاقباط على كارثة صراع الاموال

شجرة عدم الطاعة : ( 1 )

شجرة عدم الطاعة : ( 1 )
فى تاريخ كنيستنا نسمع عن شجرة الطاعة و لا نسمع عن شجرة عدم الطاعة لكن للاسف نرى ثمارها فى تاريخ كنيستنا
عندما وضعت الكنيسة " الطاعة من نذور الرهبنة و ركزت على " ابن الطاعة تحل عليه البركة " , كان لها هدف روحى واضح
فى بستان الرهبان نرى تركيز على فكرة الطاعة و كسر الهوى , لان بالطاعة يتخلى الانسان عن ذاته , كيانه , رغباته و هذه من اصعب الامور فى حياتنا
الانسان لا ينكر ذاته حتى فى علاقته باللـه فما بالك بعلاقته بالاخرين , احيانا يضطر اللـه لكسر ذواتنا لكى تخلص نفوسنا
الطاعة هى حمل الصليب خلف السيد المسيح
للحديث بقية ...............................

ميراث عدم الطاعة

لم يرث عدم المحبة من أبينا 

و لكن ورث عدم الطاعة من ابيه 

زرع الاب بذرة عدم الطاعة 

فحصد الابن ثمرها : الدم 

أخذ الاب ثمن مشورة أخيتوفل

فتصارع الابناء على تقسيمها 

فحصدوا : الدم 

حياتنا : قالب طوب

حياتنا : قالب طوب
قصة واقعية , واحد بيحب يرش قدام بيته و يغرق الشارع , فالمية اتجمعت جنب الحيطان قدام بيته و عملت بركه و مش عاوزة تنشف
قوم واحد جاره ذكى شوية جاب عربيته و ركنها جنب المية فقفل الشارع , مفيش مكان تعدى منه غير تنزل فى بركه المية رغم انه فى مكان تانى بس قدام شوية
طب الحل ايه ؟
ممكن يحرك عربيته 
ممكن اللى غرق الشارع يزيح الميه علشان متبقاش بركة 
او حد يتبرع و يعمل كده
طب ممكن حد يزعق للاتنين علشان يعملوا كده
الحل سهل و متعودين عليه نجيب قالب طوب و الناس تعدى من عليه 
و نشكر الحكومة مافيش اكتر من قوالب الطوب فى الشوارع
حياتنا بقت كلها قوالب طوب
الحلول السهلة مافيش حلول للمشكلة من اساسها
التراخى و التكاسل , نسيبها لحد ماتنشف وحدها
حط قالب الطوب و سيبها على ربنا و كله تمام
فى حياتك كام قالب طوب ؟