نفسى ارجع طفل تانى

نفسى ارجع طفل تانى :
- لما كنا اطفال كنا نقدر نصرخ و نعيط و نقول اللى فى بالنا على طول و محدش كان بيزعل و يقولوا اطفال اللى فى قلبهم على لسانهم
- دلوقتى بقى الموضوع صعب الكلمة تتحاسب عليها و الصرخة تخلى الكل يسأل فى ايه ؟
- لو قلت رأيك يزعلوا منك و يقولوا انت مش بتحترم رايهم , كأن المطلوب تسكت خالص و لو سألتهم و انتم بتحترموا راينا و يقولوا لو عجبنا
- و تسمع نفس النغمة الشباب و رايهم , نفس النغمة من عشرات السنوات , طب كل سنة فى شباب جديد هانغير راينا كل سنة !!!!!!
الواحد نفسه يرجع صغير بس الشعر الابيض برده له حلاوته

هزارك تقيل شوية

هزارك تقيل شوية :
قال لى احد الاصدقاء تصدق ربنا احيانا هزاره تقيل شوية !!!!!!!!!!!
قلت : مش فاهم ! ازاى يعنى ؟
قال : مش فاكر قصة يونان يعنى كان لازم يضرب اليقطينة , ما كان ساب يونان ينام شوية !!!!!!!!!!!
قلت : ربنا كان عاوز يعلم يونان حاجة مهمة , هو عمل معاك ايه ؟
قال : زى يونان , كل شوية حاجة بسيطة يخبيها , اروح مشوار عالفاضى و و اقول له يارب دى حاجة تافهة ماتسيبنى اعملها !!!!!!!!!
قلت : بس كده ؟؟؟؟؟
قال : الصراحة لا , كل مرة بيطلع من جوايا حاجة وحشة , فكرة او كلمة , بيكشف دايما الدمامل اللى مستخبية جوا
قلت : يعنى مش بيهزر دى بيجرح لكى يشفى
قال : ده هزار تقيل , انا كنت مرتاح كده , انا كل يوم دلوقتى اقول له بلاش هزار يارب
قلت : الاحسن تقول له اجرح كما تشاء يارب بس اعصب بسرعة , انا يارب ملك ايديك , و تشكره على هزاره الحلو ده

اعطى حساب وكالتك

مع اقتراب نهاية المشوار و الوصول للنهاية
تتسأل عن ما فعلته و الوقت الذى ذهب و هل استفاد من حولك منه
و تفكر فى كل ما لم تفعله و انتهى زمنه
هل ضاع الوقت بلا فائدة
بماذا ستجيب عندما يسألوك : ماذا فعلت بوقتك ؟ هل استفدت منه و استفاد الاخرين!
اعطى حساب وكالتك

وتظل حائرا

عندما تكون محتاجهم لا تجدهم و عندما لا تكون محتاجهم يتصلون بك ويتسألون لماذا تنساهم ؟
وتظل حائرا بماذا تجيب !!

ابوك كان قائد طابية

ابوك كان قائد طابية :
كلمة ماكنتش احب اقولها بس ................
" ابوك كان قائد طابية , لا , تبقى مش من مستوايا "
جملة مشهورة من مسرحية للاسف بقينا نسمعها كتير فى الكنيسة
لا تقال فقط بالكلمات بل بالافعال ايضا
- انت بتقرأ لابونا فلان , لا , تبقى ما بتفهمش حاجة
- انت بتقرأ للاباء و بتقول انبا فلان قال , لا , تبقى ما بتفهمش حاجة
- انت خدت كورسات فى العقيدة هناك , لا , تبقى ما بتفهمش حاجة
- انت خدت كورسات فى المشورة , لا , تبقى ما بتفهمش حاجة
- انت خدت كورسات كتاب مقدس , لا , تبقى ما بتفهمش حاجة
- انت بتقدم درس كتاب زى نظام المجموعة تلك , لا , تبقى ما بتفهمش حاجة
- انت و انت و انت ....................................
الكنيسة اتملت مجموعات كل واحد فاكر نفسه صح
يقف الواحد يشرح تبقى عارف هايقول ايه تانى و حافظ حركاته حتى لو اول مرة تشوفه لانه بقى مسخ من تلك المجموعة , ماشى زى الكتاب ما بيقول
و التانى يقول كلام حلو و مشجع , حافظ مش فاهم , مش طالع من قلبه , بس الكتاب بيقول كده
و التالت ماشى ورا ابونا فلان مافيش غيره اللى بيفهم , المهم رايه هو الصح و اللى يعترض يتقمص و يزعل
و الرابع شايف الكنيسة فى ضلال و التعليم فى خطر ليه ؟ علشان هو مش فى كرسى التعليم علشان يعلمنا الصح
الواحد خايف يجى اليوم و نسمع اللى ماخدش ابائيات او مشورة زى ما احنا بنعلم يقعد فى بيتهم احسن
احنا اللى بنفهم فى الابائيات و اللى نقدمه هو الصح
احنا اللى بنفهم ازاى نتعامل مع الاخرين و لازم تمشى زى التعليمات
فى الاخر الواضح ان احنا مش من مستواهم

ملاحظة غريبة

ملاحظة غريبة :
- حاجة لاحظتها و مش عجبانى يمكن اكون غلطان , بس ده رأيى
- الافلام الدينية رائعة و نشكر اللـه كترت و بقى اغلب القديسيين المشهورين ليهم افلام
- و لكن هل من اللائق استعمال صور الافلام اللى فيها الممثلين فى طباعة الصور الدينية او استخدامها على الانترنيت بشكل كنسى
- من زمان و احنا بنستعمل صور الممثلين اللى مثلوا افلام السيد المسيح بنفس الشكل و لكن الموضوع زاد قوى
- بالذات لما يكون القديسون دول معاصرين و صورهم الحقيقة منتشرة
و امور تانية ممكن تحصل و تعليقات لا داعى لها
( الصورة المنشورة مجرد مثال , و اعتذر لاستخدامها )
ممكن اكون غلطان فى رأيى , سامحونى

خد بالك

خد بالك :
" بحسب إيمان مختارى اللـه , عارفى اللـه , أبناء القديسين , ذوى التعاليم الشرعية الثابتة , الحاصلين على روح اللـه القدوس
أنا نفسى تعلمت هذا ممن سبقونى و ممن لديهم هذه الحكمة و من عارفى اللـه
حسب كل اقوال الحكماء أتيت أنا مقتفيا أثر كل هؤلاء
و أنا ذو السمعة الحميدة , متمسكا بنفس العقيدة
و متحمل كثيرا من أجل مجد اللـه , ومتعلما من الحكمة الإلهية "
كلام رائع و جميل , من كتبه ؟
اريوس فى كتابه " ثاليا "
لا نخدع انفسنا بكلمات حلوة و جميلة ربما ورائها سموم
( ضد الاريوسين البابا أثناسيوس الرسولى )