جاءنا البيان التالى : 2

جاءنا البيان التالى :
- من غير زعل ( 2 )
- 75% دلوقتى مرحلة تالتة فى الثانوية العامة و ماتدخلش اللى نفسك فيه
- الاجتماع الجذاب , كما قال ابونا محتاج محبة مش اوامر
- محتاج شعور بالمحبة و الانتماء للكيان المشترك الذى يجمعنا
- محتاج متكلم جيد فى موضوع جديد و شيق
- قلب يسوع , الام تريزا , فاضل نسمى اسرة مارتن لوثر و خلاص النفوس و تبقى روح المحبة متكاملة
- المحبة كويسة و لكن كنيستنا القبطية تاريخها عظيم بس للى يقدر و يفهم

جاءنا البيان التالى :

جاءنا البيان التالى :
- من غير زعل ( 1 )
مافيش جدول
- حياتى الروحية و اسرارها تخصنى انا وحدى و اب اعترافى فقط و مرشدى الروحى ان وجد .
- لا يحق لاحد ان يطلع عليها بدون ان اسمح له بذلك , و يكون شخص اثق فيه و احترمه كأخ كبير او صديق
- ليس من الضرورى ان من تختاره الكنيسة كمسئول لكونه ادارى ناجح او شخصية روحانية ان اعتبره انا كذلك
- من يريد ان يطمئن على حياتى يمكن ان يزورنى و يجلس معى و يأخذ واجب الضيافة الاسيوطى , و نتحدث بمقدار الحب الذى بيننا
- من يرغب فى معرفة امور اكثر يسأل اب الاعتراف و اذا اجابه بما يريد , فشكرا للاثنين على تعاونهم
- لكن لهم كل الحق فى التحدث معى حول تقصيرى فى حياة الجسد الواحد .
كفاية كده علشان ماحدش يقول حاجة و ده رأيى من سنوات هذه عددها

انت كويس ؟

اسف, فاتت منى واحدة , انت كويس ؟

انت جى تشتغل ايه

انت جى تشتغل ايه :
وظائف كتير موجودة ماتنفعش تتحط فى البطاقة و الاعلام زهقنا بيهم
و المشكلة انهم بيشتغلوا على الاقباط !!!!!!!!!!!!!!!!!
كاتب و مفكر و صحفى قبطى
باحث و خبير و مستشار فى الشئون القبطية
ناشط و سياسى قبطى
و غيرهم كتير
الاعلام عملهم و بيشغلهم على قفانا
المشكلة عاوزين يشتغلوا جوه الكنيسة دلوقتى , ينفع كده !!!!!!!

غريبة شوية

 غريبة شوية :
يفرح لما الناس تفتكره و تقف جنبه فى الضيقة و يزعل لما ما يحصلش و لما تقوله طيب ليه ما بتروحش لفلان او تسأل عن فلان او تقف جنب فلان
يرد و يقولك انا ماليش فى الحاجات دى , انا ما بحبش اعزى حد , الافراح بتدوشنى , ما بحبش اتكلم فى التليفون كتير
و تحتار , ليه بيزعل لما يحس انك مش مهتم بيه و هو نسيك فى اهم لحظات حياتك
و تجد نفسك تقول : جلست على قمة العالم عندما لم انتظر شىء من الاخرين

نفسى ارجع طفل تانى

نفسى ارجع طفل تانى :
- لما كنا اطفال كنا نقدر نصرخ و نعيط و نقول اللى فى بالنا على طول و محدش كان بيزعل و يقولوا اطفال اللى فى قلبهم على لسانهم
- دلوقتى بقى الموضوع صعب الكلمة تتحاسب عليها و الصرخة تخلى الكل يسأل فى ايه ؟
- لو قلت رأيك يزعلوا منك و يقولوا انت مش بتحترم رايهم , كأن المطلوب تسكت خالص و لو سألتهم و انتم بتحترموا راينا و يقولوا لو عجبنا
- و تسمع نفس النغمة الشباب و رايهم , نفس النغمة من عشرات السنوات , طب كل سنة فى شباب جديد هانغير راينا كل سنة !!!!!!
الواحد نفسه يرجع صغير بس الشعر الابيض برده له حلاوته

هزارك تقيل شوية

هزارك تقيل شوية :
قال لى احد الاصدقاء تصدق ربنا احيانا هزاره تقيل شوية !!!!!!!!!!!
قلت : مش فاهم ! ازاى يعنى ؟
قال : مش فاكر قصة يونان يعنى كان لازم يضرب اليقطينة , ما كان ساب يونان ينام شوية !!!!!!!!!!!
قلت : ربنا كان عاوز يعلم يونان حاجة مهمة , هو عمل معاك ايه ؟
قال : زى يونان , كل شوية حاجة بسيطة يخبيها , اروح مشوار عالفاضى و و اقول له يارب دى حاجة تافهة ماتسيبنى اعملها !!!!!!!!!
قلت : بس كده ؟؟؟؟؟
قال : الصراحة لا , كل مرة بيطلع من جوايا حاجة وحشة , فكرة او كلمة , بيكشف دايما الدمامل اللى مستخبية جوا
قلت : يعنى مش بيهزر دى بيجرح لكى يشفى
قال : ده هزار تقيل , انا كنت مرتاح كده , انا كل يوم دلوقتى اقول له بلاش هزار يارب
قلت : الاحسن تقول له اجرح كما تشاء يارب بس اعصب بسرعة , انا يارب ملك ايديك , و تشكره على هزاره الحلو ده